Does RB owe us credibility?

Noong una, akala ko joke lang na kasama si Ramon Bautista sa Liberal Party Christmas station ID. Pero hindi; kasama nga siya sa video.

Tapos inisip ko, baka may kahibangang purpose ang pagpayag ni RB na sumama sa video. Sa episode ng Kontrabando kung saan pinagtawanan ni Bautista, kasama ang ibang mga “co-anchors” (pansinin ang quotation marks), sinabi nila na [non-verbatim] “Pag nakaharap mo si Sec. Mar, ganunin mo din. *fistbump*”

Baka ang pagsali ni RB sa political ad na yun ay bahagi ng isang grand scheme: Matutupad ng tropang Kontrabando na maka-fistbump si Mar.

Pero lumilitaw na kay Mar na nga ang boto ni Ramon.

Nakakabugnot isipin na ang isang taong kinutya ang mga pinaggagagawa ng isang pulitiko ay biglaang magiging endorser nito. Hindi na raw kapani-paniwala si RB.

Pero saglit lang. Does Ramon actually owe us credibility?

Tandaan natin na sa kabila ng pagiging output ng News5, ang news division ng TV5, ang Kontrabando, ang Internet show na ito ay isang porma ng pagpapatse-patse ng maraming popular culture at political references. Isang katatawanan ang Kontrabando. Ang mga “anchors” ng programa ay hindi naman mga anchors in a journalistic sense; maihahalintulad mo sila kina Jaime Fabregas at Ces Quesada, na mga “anchor” ng The Sic O’Clock News sa dating IBC-13.

Mala-The Daily Show ang bira ng Kontrabando, kung iisipin: pekeng newscast, satirikal na pagtingin sa mga isyu ng lipunan. Pero si Jon Stewart, ang naging host ng TDS, ay naging isang malaking puwersa sa larangan ng pulitika. Sa katunayan, lumabas sa isang pag-aaral na ilang mga kabataan ang mas naniniwala kay Stewart kaysa sa mga tunay na anchor sa network newscasts. Hahantong tayo sa tanong na: Maihahalintulad ba natin si RB kay Jon? Malaking puwersa na ba sa pulitika si Bautista BAGO pa man siya naging endorser ni Mar?

Lahat tayo, may kanya-kanyang bet para sa pagkapangulo. To each his own, kumbaga. Pero hindi malilingid sa ating kamalayan na minsan, may isang komedyante na naging satirical news anchor na mula sa pagiging primerong kutyador ng isang pulitiko, ay naging endorser niya bigla.